എവിടുന്ന് കിട്ടിയെടാ നിനക്ക് ഈ പൈസ? നീ എന്റെ പേഴ്സിൽ നിന്ന് എടുത്തതാണോ?” ലീല ദേഷ്യം കൊണ്ട് വിറച്ചു.

“എടാ അച്ചു, ഇത് സൂക്ഷിച്ചു വെച്ചോണം… തിങ്കളാഴ്ച നമ്മൾ തകർക്കും!”

ശനിയാഴ്ച വൈകുന്നേരം ട്യൂഷൻ ക്ലാസ്സ് കഴിഞ്ഞ് മടങ്ങുന്ന വഴിയിൽ, ഇടവഴിയിലെ വലിയ മാവിന്റെ ചുവട്ടിൽ വെച്ചാണ് തനു ആ രഹസ്യം പുറത്തെടുത്തത്. അവൾ തന്റെ ചെറിയ പാവാടയുടെ പോക്കറ്റിൽ നിന്നും ചുരുട്ടിപ്പിടിച്ച ഒരു അഞ്ഞൂറു രൂപയുടെ നോട്ട് അച്ചുവിന്റെ കൈകളിലേക്ക് ബലമായി തിരുകിക്കയറ്റി.

തനുവിന്റെ കണ്ണുകളിൽ ഒരു യുദ്ധം ജയിച്ച ക്യാപ്റ്റന്റെ തിളക്കമുണ്ടായിരുന്നു. പത്തു വയസ്സുകാരിയായ തനുവിന്റെയും അച്ചുവിന്റെയും ലോകം വളരെ ചെറുതായിരുന്നു എങ്കിലും, ആ അഞ്ഞൂറു രൂപ നോട്ട് ആ നിമിഷം അവരെ സംബന്ധിച്ച് ഒരു നിധിശേഖരം തന്നെയായിരുന്നു.

“ഇതെന്താ തനു ഇത്? നിനക്ക് ഇത്രയും പൈസ എവിടുന്ന് കിട്ടി?” അച്ചു ആകെ പരിഭ്രാന്തിയിലായി. കൈയിലിരിക്കുന്ന നോട്ട് ആരെങ്കിലും കാണുമോ എന്ന് ഭയന്ന് അവൻ ചുറ്റും നോക്കി.

“അതൊക്കെ ഉണ്ട്. എന്റെ വീട്ടിൽ നിന്നാ… തിങ്കളാഴ്ച നമ്മുടെ ടീമിലെ എല്ലാവർക്കും എനിക്ക് ട്രീറ്റ് കൊടുക്കണം. ആ അമ്മുവിനും മീനുവിനും ഒക്കെ എപ്പോഴും വിചാരം അവര് മാത്രമാണ് വലിയ ആളുകൾ എന്നാണ്. കഴിഞ്ഞ ആഴ്ച അമ്മു അവളുടെ ബർത്ത്ഡേയ്ക്ക് മിഠായി തന്നപ്പോൾ എന്നെ നോക്കി കളിയാക്കി ചിരിച്ചതാ. ഇത്തവണ ഞാൻ ഐസ്ക്രീമും കേക്കുമൊക്കെ വാങ്ങി എല്ലാവർക്കും കൊടുക്കും. നീ ഇത് നിന്റെ ബാഗിൽ സൂക്ഷിച്ചു വെക്ക്. വീട്ടിൽ ആരും കാണരുത്, കേട്ടോ?” തനു തികഞ്ഞ ആജ്ഞാപിനിയുടെ സ്വരത്തിൽ പറഞ്ഞു.

“പക്ഷേ തനു… ഇത് വീട്ടിൽ അറിഞ്ഞാൽ കൊലപാതകം നടക്കും. നിന്റെ അമ്മ അറിഞ്ഞാൽ…”

“ഒരു അമ്മയും അറിയാൻ പോകുന്നില്ല,” തനു അച്ചുവിന്റെ വാ അടപ്പിച്ചു. “ഞാൻ തന്ത്രപരമായി മാറ്റിയതാ. നീ ഇത് തിങ്കളാഴ്ച രാവിലെ സ്കൂളിൽ വരുമ്പോൾ എടുത്തുകൊണ്ട് വന്നാൽ മതി. ആരും കാണാതെ സൂക്ഷിക്കണേ!”

തനു അത്രയും പറഞ്ഞ് ബാഗും തൂക്കി അവളുടെ വീട്ടു ലക്ഷ്യമാക്കി ഒരൊറ്റ ഓട്ടം വെച്ചുകൊടുത്തു. അച്ചു ആകെ ആശയക്കുഴപ്പത്തിലായി. കൈയിലിരിക്കുന്ന അഞ്ഞൂറു രൂപ അവന് ഒരു കനൽക്കട്ട പോലെ തോന്നി. വേഗം തന്നെ അവൻ അത് തന്റെ സ്കൂൾ ബാഗിന്റെ ഏറ്റവും ഉള്ളിലെ സിപ്പിൽ ഒളിപ്പിച്ചു വെച്ചു.

രാത്രി അത്താഴം കഴിഞ്ഞ് അച്ചുവിന്റെ അമ്മ ലീല അവന്റെ സ്കൂൾ ബാഗ് എടുത്ത് തിങ്കളാഴ്ചത്തേക്ക് വേണ്ടി വൃത്തിയാക്കാൻ തുടങ്ങി. സാധാരണയായി അച്ചുവിന്റെ ബാഗിൽ മിഠായി തുണ്ടുകളും, പെൻസിൽ ചെത്തിക്കൂട്ടിയതുമൊക്കെയാണ് ഉണ്ടാകാറുള്ളത്. എന്നാൽ ബാഗിന്റെ ഉൾവശത്തെ രഹസ്യ അറ തുറന്ന ലീലയുടെ കണ്ണ് തള്ളിപ്പോയി.

പുത്തൻ ഒരു അഞ്ഞൂറു രൂപ നോട്ട്!

“അച്ചൂ… എടാ അച്ചൂ, ഇങ്ങോട്ട് വന്നേ!” ലീലയുടെ ശബ്ദത്തിൽ ഒരു ഇടിമിന്നലിന്റെ ഗാംഭീര്യമുണ്ടായിരുന്നു.

അച്ചു സ്വീകരണമുറിയിൽ ടിവി കണ്ടുകൊണ്ടിരിക്കുകയായിരുന്നു. അമ്മയുടെ വിളി കേട്ടതും അവന്റെ നെഞ്ച് പടപടാ ഇടിക്കാൻ തുടങ്ങി. അവൻ പതിയെ അടുക്കളയിലേക്ക് നടന്നു. ലീലയുടെ കൈയിൽ ആ അഞ്ഞൂറു രൂപ നോട്ട് ഇരിക്കുന്നത് കണ്ടതും അവന്റെ കാൽമുട്ടുകൾ വിറച്ചു.

“എവിടുന്ന് കിട്ടിയെടാ നിനക്ക് ഈ പൈസ? നീ എന്റെ പേഴ്സിൽ നിന്ന് എടുത്തതാണോ?” ലീല ദേഷ്യം കൊണ്ട് വിറച്ചു.

“അല്ല അമ്മേ, സത്യമായിട്ടും ഞാൻ എടുത്തതല്ല!” അച്ചുവിന്റെ കണ്ണുകൾ നിറഞ്ഞു.

“പിന്നെ ഇത് നിന്റെ ബാഗിൽ എങ്ങനെ വന്നു? സത്യം പറഞ്ഞില്ലെങ്കിൽ ഞാൻ നിന്റെ അച്ഛനെ വിളിക്കും. പോലീസ് പിടിച്ചോണ്ട് പോകും നിന്നെ.” ലീല ഒരു വടി കയ്യിലെടുത്തു.

പേടിച്ചുവിറച്ച അച്ചുവിന് ഒടുവിൽ സത്യം പറയാതിരിക്കാൻ കഴിഞ്ഞില്ല. “അമ്മേ… അത്… അത് തനു തന്നതാ. തിങ്കളാഴ്ച ക്ലാസ്സിലെ പിള്ളേർക്ക് ട്രീറ്റ് കൊടുക്കാൻ വേണ്ടി എന്നെ ഏൽപ്പിച്ചതാ. അവളുടെ വീട്ടിൽ നിന്ന് എടുത്തതാണെന്നാ പറഞ്ഞത്.”

ലീല ഒന്നു ഞെട്ടി. തനുവിന്റെ അമ്മ ബിന്ദു ലീലയുടെ അടുത്ത സുഹൃത്താണ്, മാത്രമല്ല വളരെ കർക്കശക്കാരിയായ ഒരു സ്ത്രീ കൂടിയാണ്. ബിന്ദുവിന്റെ മകൾ ഇങ്ങനെ പൈസ മോഷ്ടിക്കുമെന്ന് ലീലയ്ക്ക് വിശ്വസിക്കാൻ കഴിഞ്ഞില്ല.

“തനു തന്നതാണെന്നോ? നീ എന്നെ പറ്റിക്കാൻ നോക്കണ്ട. ബിന്ദുവിന്റെ മോൾ അങ്ങനെ ചെയ്യുമോ?”

“അമ്മേ, ഞാൻ പറയുന്നത് സത്യമാണ്. വേണമെങ്കിൽ ഞാൻ തനുവിനെ ഫോൺ വിളിച്ച് ചോദിച്ചു തരാം. അവൾ എന്നെ വിളിക്കാറുണ്ട്,” അച്ചു കരഞ്ഞുകൊണ്ട് പറഞ്ഞു.

ലീല ആലോചനയിലാണ്ടു. എന്തായാലും കാര്യത്തിന്റെ സത്യാവസ്ഥ അറിയണമല്ലോ. “ശരി, നീ അവളെ ഇപ്പോൾ തന്നെ ഫോൺ ചെയ്യ്. സ്പീക്കറിൽ ഇടണം. ഞാൻ കേൾക്കട്ടെ.”

അച്ചു തന്റെ അമ്മയുടെ ചെറിയ സ്മാർട്ട്ഫോൺ എടുത്ത് തനുവിന്റെ നമ്പറിലേക്ക് വിളിച്ചു. ലീല ഫോണിന്റെ റെക്കോർഡിംഗ് ഓപ്ഷൻ ഓൺ ചെയ്യാൻ അച്ചുവിനോട് ആംഗ്യം കാണിച്ചു. അച്ചു വേഗം തന്നെ റെക്കോർഡിംഗ് അമർത്തി, ഫോൺ സ്പീക്കറിലിട്ടു.

രണ്ടു ബെല്ലിന് ശേഷം മറുപുറത്ത് തനു ഫോണെടുത്തു. ശബ്ദം കേൾക്കുമ്പോൾ അവൾ പുതപ്പിനുള്ളിൽ ഒളിച്ചിരുന്ന് സംസാരിക്കുകയാണെന്ന് മനസ്സിലാകും.

“ഹലോ, അച്ചൂ… എന്താടാ ഈ സമയത്ത്? വീട്ടിൽ ആരെങ്കിലും കണ്ടോ?” തനുവിന്റെ ശബ്ദത്തിൽ പരിഭ്രാന്തിയുണ്ടായിരുന്നു.

“തനു… നീ തന്ന ആ അഞ്ഞൂറു രൂപ ഇല്ലേ… അത് എന്റെ അമ്മ കണ്ടുപിടിച്ചു. അമ്മ എന്നെ തല്ലാൻ തുടങ്ങുവാ. നീ ഇത് എവിടുന്ന് എടുത്തതാന്ന് പറ…” അച്ചു കരച്ചിലിന്റെ വക്കിലെത്തി പറഞ്ഞു.

“അയ്യോ! നിന്റെ അമ്മ കണ്ടോ? നീ എന്തിനാടാ അത് അമ്മയ്ക്ക് കാണിച്ചു കൊടുത്തത്?” തനു ദേഷ്യപ്പെട്ടു. “ഞാൻ നിന്നോട് പറഞ്ഞതല്ലേ ആരും കാണാതെ വെക്കാൻ! എന്റെ വീട്ടിൽ എന്റെ അച്ഛൻ വലിയൊരു തുക അലമാരയിൽ വെച്ചിട്ടുണ്ടായിരുന്നു. അതിൽ നിന്ന് അമ്മ അറിയാതെ ഞാൻ ഒരെണ്ണം ഒപ്പിച്ചതാ. എന്റെ അമ്മ അറിഞ്ഞിട്ടില്ല. നീ അത് നിന്റെ അമ്മയോട് എന്തെങ്കിലും കള്ളം പറഞ്ഞു നിൽക്ക് , തിങ്കളാഴ്ച നമുക്ക് ഐസ്ക്രീം കഴിക്കാനുള്ളതാ.”

“പക്ഷേ തനു, എന്റെ അമ്മ ഇത് നിന്റെ അമ്മയോട് പറയും എന്ന് പറയുന്നു…” അച്ചു പറഞ്ഞു.

“നീ പേടിക്കണ്ട. നീ ഒന്നിനും സമ്മതിക്കരുത്. എന്റെ അമ്മയോട് പറഞ്ഞാലും എന്റെ അമ്മ വിശ്വസിക്കില്ല. ഞാൻ പറയും നീ കള്ളം പറയുകയാണെന്ന്. അതുകൊണ്ട് നീ മിണ്ടാതിരുന്നോ. ഫോൺ വെക്ക്, അമ്മ വരുന്നുണ്ട്.” തനു വേഗം ഫോൺ കട്ട് ചെയ്തു.

ലീല ഫോൺ കോൾ റെക്കോർഡിംഗ് സേവ് ചെയ്തു. അവളുടെ മുഖം ഗൗരവമുള്ളതായി. കുട്ടികൾ ഇത്രയും വലിയ കള്ളത്തരം കാണിക്കുമെന്ന് അവൾ കരുതിയതേയില്ല. പ്രത്യേകിച്ച് തനുവിനെപ്പോലെ പഠിക്കാൻ മിടുക്കിയായ ഒരു കുട്ടി.

പിറ്റേന്ന് രാവിലെ തന്നെ ലീല തനുവിന്റെ വീട്ടിലേക്ക് നടന്നു. കൈയിൽ അച്ചുവിന്റെ ഫോണും ആ അഞ്ഞൂറു രൂപ നോപ്പുമുണ്ടായിരുന്നു. ബിന്ദു ഉമ്മറത്ത് പത്രം വായിച്ചുകൊണ്ടിരിക്കുകയായിരുന്നു. ലീലയെ കണ്ടതും ബിന്ദു പുഞ്ചിരിയോടെ എതിരേറ്റു.

“എന്താ ലീലേ, രാവിലെ തന്നെ? മുഖത്തൊരു ഗൗരവമൊക്കെ ഉണ്ടല്ലോ?” ബിന്ദു ചോദിച്ചു.

“ബിന്ദൂ… ഒരു പ്രധാനപ്പെട്ട കാര്യം പറയാൻ വന്നതാ. തനു മോളെവിടെ?” ലീല ചുറ്റും നോക്കി.

“അവൾ അകത്ത് ഇരുന്ന് പഠിക്കുകയാ. എന്താ കാര്യം?”

ലീല തന്റെ പോക്കറ്റിൽ നിന്നും അഞ്ഞൂറു രൂപ നോട്ട് എടുത്ത് ബിന്ദുവിന്റെ മുന്നിലെ മേശപ്പുറത്ത് വെച്ചു. “ഇത് നിന്റെ പൈസയാണോ എന്ന് നോക്കിക്കേ. ഇന്നലെ രാത്രി അച്ചുവിന്റെ ബാഗിൽ നിന്ന് കിട്ടിയതാ.”

ബിന്ദു ആ പൈസ നോക്കി ചിരിച്ചു. “ഇതെങ്ങനെ എന്റെ പൈസയാകും ലീലേ? എന്റെ വീട്ടിൽ പൈസയൊക്കെ കൃത്യമായി അലമാരയിലാണ് വെക്കാറുള്ളത്. അച്ചുവിന് എവിടുന്ന് എങ്കിലും കിട്ടിയതായിരിക്കും.”

“അല്ല ബിന്ദൂ, ഇത് തനു നിന്റെ വീട്ടിൽ നിന്ന് എടുത്ത് അച്ചുവിനെ ഏൽപ്പിച്ചതാ. തിങ്കളാഴ്ച സ്കൂളിൽ പിള്ളേർക്ക് ട്രീറ്റ് കൊടുക്കാൻ വേണ്ടിയാണത്രേ,” ലീല കാര്യം വ്യക്തമാക്കി.

ബിന്ദുവിന്റെ മുഖം പെട്ടെന്ന് മാറി. പുഞ്ചിരി അപ്രത്യക്ഷമായി, പകരം ദേഷ്യവും അഹങ്കാരവും വന്നു നിറഞ്ഞു. “എന്ത്? എന്റെ തനു പൈസ മോഷ്ടിച്ചെന്നോ? ലീലേ, നീ എന്തൊക്കെയാണ് ഈ പറയുന്നത്? എന്റെ മകൾ അങ്ങനെ ഒരിക്കലും ചെയ്യില്ല. അവൾക്ക് ആവശ്യമുള്ളതെല്ലാം ഞങ്ങൾ വാങ്ങി കൊടുക്കുന്നുണ്ട്. നിന്റെ മകൻ എവിടുന്ന് എങ്കിലും മോഷ്ടിച്ചതാവും, എന്നിട്ട് എന്റെ മകളുടെ തലയിൽ ഇടാൻ നോക്കുകയാണോ?”

“ബിന്ദൂ, നീ ദേഷ്യപ്പെടാതെ ഞാൻ പറയുന്നത് കേൾക്ക്…” ലീല ശാന്തമാക്കാൻ ശ്രമിച്ചു.

“എനിക്ക് ഒന്നും കേൾക്കണ്ട! എന്റെ മകളെക്കുറിച്ച് ഇങ്ങനെയൊരു കള്ളക്കഥ പറയാൻ നിനക്ക് എങ്ങനെ തോന്നി? അവൾ പഠിക്കാൻ മിടുക്കിയാണ്, നല്ല സ്വഭാവമാണ്. നിന്റെ മകൻ കള്ളം പറയുന്നതാണ്.” ബിന്ദു ശബ്ദമുയർത്തി.

ശബ്ദം കേട്ട് തനുവും അവളുടെ അച്ഛൻ ശേഖരനും ഉമ്മറത്തേക്ക് വന്നു.

“എന്താ ബിന്ദൂ ഇവിടെ ഒരു ബഹളം?” ശേഖരൻ ചോദിച്ചു.

“ദേ നോക്ക് ശേഖരേട്ടാ, ലീല വന്നു പറയുകയാണ് നമ്മുടെ തനു നമ്മുടെ വീട്ടിൽ നിന്ന് അഞ്ഞൂറു രൂപ മോഷ്ടിച്ച് അച്ചുവിന് കൊടുത്തു എന്ന്!” ബിന്ദു പരാതിപ്പെട്ടു.

ശേഖരൻ തനുവിനെ നോക്കി. തനുവിന്റെ മുഖം വിളറിയിരുന്നു. അവൾ ഭയത്തോടെ ലീലയെ നോക്കി. പക്ഷേ അവൾ ധൈര്യം സംഭരിച്ച് പറഞ്ഞു, “അമ്മേ, ഞാൻ ഒരു പൈസയും എടുത്തിട്ടില്ല. അച്ചു കള്ളം പറയുകയാണ്. അവൻ എന്നെ എപ്പോഴും കളിയാക്കാറുണ്ട്. എന്നെ ചീത്തപ്പേര് കേൾപ്പിക്കാൻ അവൻ മനഃപൂർവ്വം പറയുന്നതാ.”

തനുവിന്റെ കള്ളം കേട്ടപ്പോൾ ലീലയ്ക്ക് സങ്കടവും ദേഷ്യവും ഒരുമിച്ച് വന്നു. കുട്ടികൾ ഇത്രയും വലിയ നുണകൾ യാതൊരു ഭയവുമില്ലാതെ പറയുന്നത് അങ്ങേയറ്റം അപകടകരമാണെന്ന് അവൾക്ക് മനസ്സിലായി.

“തനു മോളേ, നീ ഇപ്പോഴും കള്ളം പറയുകയാണോ?” ലീല ചോദിച്ചു.

“ലീലേ, നീ എന്റെ മകളെ ഭീഷണിപ്പെടുത്തണ്ട. ഇവിടുന്ന് ഇറങ്ങിപ്പോകാൻ നോക്ക്,” ബിന്ദു ആക്രോശിച്ചു.

ലീല ഒട്ടും കുലുങ്ങിയില്ല. അവൾ തന്റെ കൈയിലിരുന്ന ഫോൺ എടുത്തു. “ബിന്ദൂ, നീ നിന്റെ മകളെ അന്ധമായി വിശ്വസിക്കുന്നത് കൊണ്ടാണ് ഇത് ഇവിടെ വരെ എത്തിയത്. ദയവായി ഇത് ഒന്ന് കേൾക്ക്.”

ലീല ഫോണിലെ ആ ഓഡിയോ ക്ലിപ്പ് പ്ലേ ചെയ്തു.

സ്പീക്കറിലൂടെ തനുവിന്റെ ശബ്ദം വ്യക്തമായി കേൾക്കാൻ തുടങ്ങി: “അയ്യോ! നിന്റെ അമ്മ കണ്ടോ? നീ എന്തിനാടാ അത് അമ്മയ്ക്ക് കാണിച്ചു കൊടുത്തത്? എന്റെ വീട്ടിൽ എന്റെ അച്ഛൻ വലിയൊരു തുക അലമാരയിൽ വെച്ചിട്ടുണ്ടായിരുന്നു. അതിൽ നിന്ന് അമ്മ അറിയാതെ ഞാൻ ഒരെണ്ണം ഒപ്പിച്ചതാ…”

ഫോൺ റെക്കോർഡിംഗ് അവസാനിച്ചപ്പോൾ ആ ഉമ്മറത്ത് കടുത്ത നിശബ്ദത പടർന്നു. തനു തലതാഴ്ത്തി കരയാൻ തുടങ്ങി. അവളുടെ കള്ളത്തരം പൂർണ്ണമായും പിടിക്കപ്പെട്ടിരുന്നു.

ബിന്ദു പ്രതിമ കണക്കെ നിന്നുപോയി. തന്റെ മകൾ ഇത്രയും വലിയൊരു ചതിയും കള്ളവും കാണിച്ചുവെന്ന് അവൾക്ക് വിശ്വസിക്കാൻ കഴിഞ്ഞില്ല. ശേഖരന്റെ മുഖം ദേഷ്യം കൊണ്ട് ചുവന്നു.

“തനൂ…” ശേഖരൻ ഗർജ്ജിച്ചു. “നീ എവിടുന്ന് എടുത്തതാ ഈ പൈസ?”

തനു വിറച്ചുകൊണ്ട് പറഞ്ഞു, “അച്ഛാ… അത്… കഴിഞ്ഞ ദിവസം അച്ഛൻ തയ്ക്കാൻ കൊടുക്കാൻ വേണ്ടി മാറ്റിവെച്ച കാശിൽ നിന്ന് ഞാൻ എടുത്തതാ… എന്നെ തല്ലരുതേ അച്ഛാ…” അവൾ ബിന്ദുവിന്റെ പുറകിൽ ഒളിച്ചു.

ബിന്ദുവിന്റെ കണ്ണുകളിൽ നിന്നും കണ്ണീർ ഒഴുക്കാൻ തുടങ്ങി. അവൾ ലീലയുടെ മുന്നിൽ നാണംകെട്ടു നിന്നു. താൻ കുറച്ചു മുൻപ് ലീലയോട് പറഞ്ഞ വാക്കുകൾ ഓർത്ത് അവൾക്ക് സ്വയം ലജ്ജ തോന്നി.

“ലീലേ… എന്നോട് ക്ഷമിക്കണം. ഞാൻ എന്റെ മോളെ അന്ധമായി വിശ്വസിച്ചു. നിന്നെയും അച്ചുവിനെയും ഒരുപാട് വിഷമിപ്പിച്ചു,” ബിന്ദു കൈകൾ കൂപ്പി.

ലീല ബിന്ദുവിന്റെ കൈകൾ ചേർത്തുപിടിച്ചു. “ബിന്ദൂ, ഞാൻ വന്നത് നിന്നെ കുറ്റപ്പെടുത്താനല്ല. നമ്മുടെ കുട്ടികൾ തെറ്റായ വഴിക്ക് സഞ്ചരിക്കുമ്പോൾ അത് തിരുത്തേണ്ടത് നമ്മുടെ കടമയാണ്. ഇന്ന് നമ്മൾ ഇത് കണ്ടില്ലെന്ന് വെച്ചാൽ നാളെ അവർ ഇതിലും വലിയ തെറ്റുകൾ ചെയ്യും. തനുവിനെ തല്ലുകയല്ല വേണ്ടത്, സ്നേഹത്തോടെ കാര്യങ്ങൾ പറഞ്ഞു മനസ്സിലാക്കുകയാണ് വേണ്ടത്.”

ലീല ആ അഞ്ഞൂറു രൂപ മേശപ്പുറത്ത് വെച്ചിട്ട് പുഞ്ചിരിയോടെ അവിടെ നിന്നും ഇറങ്ങി നടന്നു.

അന്നു വൈകുന്നേരം തനുവിന്റെ വീട്ടിൽ ഒരു വലിയ കൗൺസിലിംഗ് തന്നെ നടന്നു. ശേഖരനും ബിന്ദുവും തനുവിനെ അരികിലിരുത്തി സംസാരിച്ചു.

“മോളേ, കൂട്ടുകാർക്ക് ട്രീറ്റ് കൊടുക്കുന്നതോ മിഠായി വാങ്ങി നൽകുന്നതോ തെറ്റല്ല. പക്ഷേ അതിനായി വീട്ടിൽ നിന്നും മോഷ്ടിക്കുന്നത് വലിയ തെറ്റാണ്. നിനക്ക് എന്തെങ്കിലും വേണമെങ്കിൽ ഞങ്ങളോട് ചോദിക്കണമായിരുന്നു,” ശേഖരൻ അവളെ മടിയിലിരുത്തി പറഞ്ഞു.

“എനിക്ക് മനസ്സിലായി അച്ഛാ… ഇനി ഞാൻ ഒരിക്കലും ഇങ്ങനെ ചെയ്യില്ല. എന്നോട് ക്ഷമിക്കണം,” തനു കരഞ്ഞുകൊണ്ട് അച്ഛനെയും അമ്മയെയും കെട്ടിപ്പിടിച്ചു.

തിങ്കളാഴ്ച രാവിലെ സ്കൂളിലെത്തിയപ്പോൾ തനു നേരെ അച്ചുവിന്റെ അടുത്തേക്ക് ചെന്നു. അവളുടെ കൈയിൽ ഒരു ചെറിയ പൊതിയുണ്ടായിരുന്നു.

“അച്ചൂ… എന്നോട് ക്ഷമിക്കണം. ഞാൻ കാരണം നിനക്ക് ഒരുപാട് വഴക്ക് കേൾക്കേണ്ടി വന്നു,” തനു സങ്കടത്തോടെ പറഞ്ഞു.

“അതൊന്നും സാരമില്ല തനു. നമ്മൾ ഇപ്പോഴും കൂട്ടുകാരല്ലേ,” അച്ചു ചിരിച്ചുകൊണ്ട് പറഞ്ഞു.

തനു തന്റെ കൈയിലിരുന്ന പൊതി തുറന്നു. അതിൽ അവളുടെ അമ്മ ബിന്ദു വീട്ടിൽ ഉണ്ടാക്കി കൊടുത്ത കുറച്ചു നെയ്യപ്പങ്ങളായിരുന്നു.

“ദേ… എന്റെ അമ്മ തന്നു വിട്ടതാ. ക്ലാസ്സിലെ എല്ലാവർക്കും കൊടുക്കാൻ പറഞ്ഞു. മോഷ്ടിച്ച പൈസ കൊണ്ടല്ല, അമ്മയുടെ സ്നേഹം കൊണ്ടുള്ള ട്രീറ്റ്!” തനു സന്തോഷത്തോടെ പറഞ്ഞു.

അച്ചുവും തനുവും ചേർന്ന് ആ നെയ്യപ്പങ്ങൾ ക്ലാസ്സിലെ എല്ലാ കൂട്ടുകാർക്കും വീതിച്ചു നൽകി. അന്ന് അവർ കഴിച്ച ആ നെയ്യപ്പത്തിന് ലോകത്തിലെ ഏറ്റവും വിലകൂടിയ ഐസ്ക്രീമിനേക്കാൾ മധുരമുണ്ടായിരുന്നു.

ആമി