(രചന: പ്രജിത്ത് സുരേന്ദ്രബാബു)
” കുട്ടി ഒരു കാര്യം ചോദിച്ചാൽ ദേഷ്യപ്പെടരുത്.. എന്റെ ഉള്ളിലെ ഒരു ആഗ്രഹം ആണ്. ഞാൻ ചോദിക്കുന്നതിനോട് താത്പര്യം ഇല്ലേൽ ജസ്റ്റ് ലീവ് ഇറ്റ്.. ”
കോളേജ് ഗ്രൗണ്ടിൽ ഗേറ്റിനരികിൽ നിന്ന് കിരണിന്റെ ചോദ്യം കേട്ട് സംശയത്തോടെ ആ പെൺകുട്ടി നിന്നു.” എന്താ ചേട്ടാ.. ചോദിക്ക് ”
” അത് പിന്നെ.. കുട്ടിയെ എനിക്ക് മുൻപരിചയം ഒന്നും ഇല്ല പക്ഷെ ഒറ്റ നോട്ടത്തിൽ ഇഷ്ടമായി. ഒരു രാത്രിയോ പകലോ എനിക്കൊപ്പം ഒന്ന് കിടക്കാവോ.. കാര്യം കഴിഞ്ഞാൽ പതിനായിരം രൂപ കയ്യിൽ വച്ചു തരാം. ആലോചിച്ചു മറുപടി പറഞ്ഞാൽ മതി. ”
ആ ചോദ്യം കേട്ടുള്ള അവളുടെ നടുക്കം കണ്ട് ചുറ്റും ആരേലും ശ്രദ്ധിക്കുന്നുണ്ടോ എന്ന് പതിയെ കറങ്ങി നോക്കി കിരൺ..
” ആലോചിച്ചു മറുപടി പറഞ്ഞാൽ മതി. ആരും അറീല്ല പതിനായിരം രൂപയും കിട്ടും “അവൾ ഒന്നും പറഞ്ഞില്ല. അവനെ തന്നെ തുറിച്ചു നോക്കി നിന്ന ആ മിഴികളിൽ പതിയെ നനവ് പടർന്നു. നിമിഷങ്ങൾക്കകം മിഴിനീർ പൊഴിച്ച് കൊണ്ടവൾ നടന്നു നീങ്ങുമ്പോൾ വല്ലാത്ത ലഹരിയിൽ നോക്കി നിന്നു കിരൺ.
” ഹോ.. എന്റെ പൊന്നളിയാ ഞാൻ അത് ചോദിച്ചപ്പോ അവളുടെ മുഖത്തെ ഒരു എക്സ്പ്രഷൻ.. എന്നാ മുടിഞ്ഞ ഗ്ലാമറാ ടാ ആ കൊച്ചിന്.. ദയനീയതയോടെ അവളെന്നെ നോക്ക്യപ്പോ വല്ലാത്ത ഫീൽ.”
തിരികെ കൂട്ടുകാർക്കിടലേക്കെത്തുമ്പോഴും ദൂരേക്ക് പോയ പെൺകുട്ടിയെ തന്നെ നോക്കി വെള്ളമിറക്കി കിരൺ.
” നിനക്കിത് എന്തിന്റെ കേടാ അളിയാ വഴീൽ കാണുന്ന പെൺപിള്ളേരോട് ഒക്കെ കേറി കൂടെ കിടക്കോ ന്ന് ചോദിക്കുന്നത്.. നീ അത്രക്ക് സൈക്കോ ആണോ.. അല്ല അവളുമാര് വന്നാൽ കൊടുക്കാൻ നിന്റേൽ ക്യാഷ് ഉണ്ടോ “കൂട്ടുകാരൻ ആനന്ദിന്റെ ചോദ്യം കേട്ട് പൊട്ടിച്ചിരിച്ചു കിരൺ.
” ഇതൊക്കെ ഒരു രസം അല്ലേ അളിയാ.. ഞാൻ ചോദിക്കുമ്പോൾ അവളുമാരുടെ ആ ഒരു എക്സ്പ്രഷൻ കാണാൻ തന്നെ എന്നാ ഒരു ഫീൽ ആണ്… ഇങ്ങനൊക്കെ ചെന്ന് പെട്ടെന്ന് ചോദിച്ചാൽ ആരേലും സമ്മതിക്കോ.. അതോണ്ട് കാശിന്റെ കാര്യത്തിൽ ടെൻഷൻ വേണ്ട.. ”
ആ മറുപടി കേട്ട് സുഹൃത്തുക്കൾ പരസ്പരം മുഖാമുഖം നോക്കുമ്പോൾ വീണ്ടും അടുത്ത പെൺകുട്ടിയെ കണ്ടെത്തി കിരൺ.
” ദേ ഒരുത്തി വരുന്നുണ്ട് അവളോട് ഒന്ന് ചോദിക്കട്ടെ.. “വഷളൻ ചിരിയുമായി അവൻ അവൾക്കരികിലേക്ക് പോകുമ്പോൾ കൗതുകത്തോടെ നോക്കിയിരുന്നു ആനന്ദും മറ്റു സുഹൃത്തുക്കളും.
“അപാര ഐറ്റം തന്നെ ഇവൻ “കൂട്ടുകാരിൽ ഒരുവന്റെ കമന്റ് കേട്ട് എല്ലാവരും പൊട്ടിചിരിച്ചു പോയി.
പെൺകുട്ടിക്ക് മുന്നിൽ കിരൺ പോകുന്നതും അവളോട് ചോദിക്കുന്നതുമൊക്കെ കൗതുകത്തോടെ നോക്കി നിന്നു അവർ.
” ഛീ.. വൃത്തികേട് ചോദിക്കുന്നുവോ.. നിന്റെ അമ്മയോട് പോയി ചോദിക്കെടാ “അറപ്പോടെ അവൾ നടന്നകലുമ്പോൾ ജാള്യത മറച്ചു വച്ച് പുഞ്ചിരിയോടെ തന്നെ തിരികെയെത്തി കിരൺ..
“അളിയാ ഇത് ചീറ്റി അല്ലേ..”ആനന്ദിന്റെ ചോദ്യം കേട്ട് വീണ്ടും പുഞ്ചിരിച്ചു അവൻ.” ഇത് സ്ഥിരം അല്ലേ അളിയാ ചിലര് കരയും ചിലര് ഒന്നും മിണ്ടില്ല മറ്റു ചിലര് ഇങ്ങനെ ചീത്ത പറയും.. ഓരോന്നും കാണുമ്പോ ഓരോ ഫീൽ അല്ലേ ”
ആ മറുപടിയിൽ തന്നെ അവനൊരു സൈക്കോ ആണെന്ന് തോന്നിപോയി സുഹൃത്തുക്കൾക്കും. പിന്നെയും സമയം നീങ്ങി. അതിനിടയിൽ പല പെൺകുട്ടികളോടും കിരൺ ഈ ആവശ്യം ചോദിച്ചു. അവരുടെയൊക്കെ പക്കൽ നിന്നും പല പല പ്രതികരണങ്ങളും ലഭിച്ചു.
അതൊക്കെ കണ്ട് കൗതുകത്തോടെ നോക്കിയിരുന്നു അവന്റെ സുഹൃത്തുക്കൾ. പതിയെ പതിയെ അവരും കിരണിന്റെ ആ പ്രവർത്തിയിൽ ആനന്ദം കണ്ടെത്തി തുടങ്ങി.” ഇന്നത്തേക്ക് ആയി അളിയാ ഇനി നാളെ ”
ആകെ സന്തോഷത്തോടെയാണ് അവൻ തിരികെ വീട്ടിലേക്ക് പോകാൻ തന്റെ ബൈക്കിലേക്ക് കയറിയത്. അപ്പോഴേക്കും ആനന്ദ് അരികിലേക്ക് ചെന്നു.
“അളിയാ മേഴ്സി മിസ്സ്‌ ദേ വരുന്നുണ്ട്. അവരോട് പോയി ഈ ചോദ്യം ചോദിക്കാൻ ധൈര്യം ഉണ്ടോ നിനക്ക്‌ ”
ഇത്തവണ അവനെ ചലഞ്ചു ചെയ്യാൻ തന്നെയായിരുന്നു സുഹൃത്തുക്കളുടെ ലക്ഷ്യം. കാരണം അവർക്ക് അറിയാമായിരുന്നു ഒരിക്കലും മിസ്സിനോട് പോയി ഈ ചോദ്യം ചോദിക്കാൻ അവന് ധൈര്യം ഉണ്ടാകില്ല എന്ന്.
അങ്ങനൊരു നീക്കം കിരണും പ്രതീക്ഷിച്ചില്ല. പൊതുവെ മേഴ്സി മിസ്സ്‌ ആള് ഫ്രണ്ട്‌ലി ആണേലും ഇങ്ങനൊരു ചോദ്യം ചോദിച്ചാൽ അവരുടെ പ്രതികരണം എന്താകും എന്നത് ഊഹിക്കാൻ പോലും കഴിയില്ല.
പക്ഷെ ഇപ്പോൾ പിന്മാറിയാൽ കൂട്ടുകാരുടെ മുന്നിൽ തനിക്കു അതൊരു ക്ഷീണം ആകും എന്നതും അവനെ കുഴക്കി. അല്പം ആലോചിച്ച ശേഷം കൂട്ടുകാരെ ഞെട്ടിച്ചു കൊണ്ട് കിരൺ ആ വെല്ലുവിളി ഏറ്റെടുത്തു.
” ഓക്കേ ഞാൻ റെഡി.. പക്ഷെ ഞാൻ മിസ്സിനോട് ചോദിച്ചാൽ നിങ്ങൾ എനിക്ക് എന്ത് തരും “” ആയിരം രൂപ ഞാൻ തരും ഉറപ്പ് ”
ആവേശത്തോടെ കൂട്ടുകാരിൽ ഒരുവൻ മുന്നിലേക്ക് വന്നപ്പോൾ കിരണിനും ചെറിയ ആവേശമായി. പക്ഷെ മിസ്സിനോട് എങ്ങിനെ ചോദിക്കും എന്നത് അവന് അപ്പോഴും വലിയ ടെൻഷൻ ഉണ്ടാക്കി.
‘ ഈ കാര്യം ചോദിക്കാനാണെന്നും പറഞ്ഞു പോയിട്ട് മിസ്സിനോട് വേറെന്തേലും ചോദിച്ചു വരാം.. ‘ആലോചിച്ചു അവൻ കണ്ടെത്തിയ പ്ലാൻ അതായിരുന്നു.
” അളിയാ നീ ചോദിക്കുന്നത് ഞങ്ങൾക്ക് കേൾക്കണം കേട്ടോ.. ഇവിടുന്ന് ചോദിക്കാനെന്ന് പറഞ്ഞു പോയിട്ട് അവിടെ പോയി മറ്റെന്തേലും ചോദിച്ചു ഞങ്ങടെ മുന്നിൽ ഉഡായിപ്പ് കാണിക്കാൻ നിൽക്കരുത് ”
ആനന്ദിനെ ഓർമപ്പെടുത്തലോടെ ആ പ്ലാനും പൊളിഞ്ഞു.” ഞാൻ ചോദിക്കാം.. എനിക്ക് ഒരു മടീം ഇല്ല എത്രയോ പേരോട് ഞാൻ ചോദിച്ചേക്കുന്നു ”
ഒടുവിൽ ധൈര്യം സംഭവിച്ചു കൊണ്ട് കിരൺ മേഴ്സിക്ക് നേരെ നടന്നപ്പോൾ നെഞ്ചിടിപ്പോടെ നോക്കി നിന്നു സുഹൃത്തുക്കൾ
” അളിയാ മിസ്സിനോട് അവൻ ചോദിച്ചാൽ ഉറപ്പ് അവൻ ആള് പുലിക്കുട്ടി തന്നെ.. “” കണ്ടറിയാം.. ഇനി ചോദിച്ചാൽ മറ്റൊന്ന് ഉറപ്പ് അളിയന് ഇന്ന് തന്നെ സസ്‌പെൻഷനോ ഡിസ്മിസ്സലോ കിട്ടും ”
കൂട്ടുകാർ പരസ്പരം സംസാരിക്കുമ്പോൾ മേഴ്സിക്ക് നേരെ നടന്നടുത്ത കിരണിന്റെ നെഞ്ചിടിപ്പേറി. അവനെ അരികിൽ കണ്ട് ഒന്ന് പുഞ്ചിരിച്ചു മേഴ്സി.
“എന്താ കിരൺ ഒരു കറക്കം ഇന്ന് ക്ലാസ്സിൽ ഒന്നും കേറിയില്ലേ. “അവൾ തിരക്കുമ്പോൾ ഒന്ന് പുഞ്ചിരിച്ചു കിരൺ.” അത്.. ഇന്ന് കേറിയില്ല.. ഇപ്പോൾ കേറും.. ”
ആ മറുപടി കേട്ട് പതിയെ തല കുലുക്കി മേഴ്സി.” കൊള്ളാം കൊള്ളാം ക്ലാസ്സിൽ കേറാതെ ഇങ്ങനെ കറങ്ങി നടക്ക് അതേ ”
അവളുമായുള്ള സംഭാഷണം കിരണിന് അല്പം ധൈര്യം പകർന്നിരുന്നു.”മിസ്സ്‌…എനിക്കൊരു കാര്യം ചോദിക്കാൻ ഉണ്ട്. ”
ധൈര്യം ചോറാതെ തന്നെ അവൻ ചോദിക്കുമ്പോൾ എന്താണെന്ന് അറിയാൻ ആകാംക്ഷയിൽ ഒന്ന് നിന്നു മേഴ്സി.” എന്താടോ എന്താണ് ”
” അത് മിസ്സ്‌.. ഞാൻ ചോദിക്കുന്നത് കേട്ടിട്ട് ഇഷ്ടമായില്ലേൽ ദേഷ്യപ്പെടരുത്.. ഇതും മാഡം ഫ്രണ്ട്‌ലി ആയി കാണണം “മുഖവുര ഏറിയതോടെ മേഴ്സിയുടെ നെറ്റി ചുളിഞ്ഞു.”ഒന്ന് പറയ് താൻ..”
അവളുടെ ക്ഷമ നശിച്ചതോടെ വീണ്ടും ഒന്ന് ചുറ്റും കറങ്ങി നോക്കി കിരൺ. കൂട്ടുകാർ എല്ലാവരും തങ്ങളെ ചുറ്റി തന്നെ നിൽക്കുന്നുണ്ട് എന്നത് മനസിലാക്കിയതോടെ ചോദിക്കാതെ നിർവാഹമില്ല എന്നായി.
” മിസ്സ്‌.. എ.. എനിക്ക് മിസ്സിനെ വല്യ ഇഷ്ടം ആണ്. ഒ.. ഒരു ദിവസം എന്നോടൊപ്പം കിടക്കാവോ പതിനായിരം രൂപ തരാം ഞാൻ ”
വിറച്ചു വിറച്ചുള്ള ആ ചോദ്യം കേട്ട് ഒരു നിമിഷം നടുക്കത്തോടെ നിന്നു മേഴ്സി.” അളിയാ.. കിരണിന്റെ കാര്യത്തിൽ തീരുമാനം ആയി.. “കേട്ടു നിന്ന കൂട്ടുകാരിൽ ഒരുവൻ ആനന്ദിന്റെ ചെവിയിൽ പറഞ്ഞു.
മിസ്സ്‌ തന്നെ തന്നെ ഉറ്റുനോക്കുന്നത് കണ്ട് കിരണും അല്പമൊന്ന് ഭയന്നു. എന്നാൽ അല്പസമയം അവനെ നോക്കി നിന്ന ശേഷം പെട്ടെന്ന് പുഞ്ചിരിച്ചു മേഴ്സി.
” താൻ ആള് കൊള്ളാലോ .. എന്റെ ഒരു ദിവസത്തിന് പതിനായിരം രൂപയോ… എന്നെക്കണ്ടാൽ അങ്ങിനൊക്കെ തോന്നോ. പതിനായിരത്തിനൊക്കെ ഉണ്ടോ ഞാൻ ”
ആ ചോദ്യം ഒട്ടും പ്രതീക്ഷിച്ചില്ല കിരൺ.” അത് പിന്നേ മിസ്സ്‌.. “ഇത്തവണ അവനൊന്നു പതറി.” മനസ്സിലെ ആഗ്രഹം ഒരു പെണ്ണിനോട് പതറാതെ പറയാൻ പോലും പറ്റാത്ത നീ ആണോ കൂടെക്കിടക്കാൻ ആളെ തിരക്കുന്നത് ”
പുച്ഛത്തോടെ
മുന്നിലേക്ക് നടന്ന മേഴ്സി ഒന്ന് നിന്നു.. നടുക്കത്തോടെ നിൽക്കുന്ന കിരണിനെ ഒന്ന് തിരിഞ്ഞു നോക്കി അവർ
” അതേ.. നീ വേറെ ആളെ നോക്ക് ഇപ്പോൾ എന്തായാലും എനിക്ക് താത്പര്യം ഇല്ല.. ഇനി എന്നേലും താത്പര്യം തോന്നുന്നേൽ പറയാം കേട്ടോ..
ആ മറുപടി കേട്ട് കിരൺ മാത്രമല്ല കുറച്ചകലെ ഒളിച്ചു നിന്ന് അവരുടെ സംഭാഷണം കേട്ടു നിന്ന സുഹൃത്തുക്കളും നടുങ്ങി.
” ഇവർക്ക് എന്താ വട്ടായോ.. ഒരുത്തൻ അതും സ്വന്തം സ്റ്റുഡന്റ് വന്ന് ഓപ്പൺ ആയി കൂടെ കിടക്കോ ന്ന് ചോദിച്ചപ്പോ ഇങ്ങനാണോ മറുപടി പറയുന്നേ. ”
” ഇവര് മറ്റേ കുലസ്ത്രീ പട്ടം വിട്ട് ഇപ്പോൾ നവോഥാനത്തിന് പിന്നാലെയാണ് അതാകും ഇങ്ങനൊരു മറുപടി ”
കൂട്ടുകാർ പരസ്പരം സംസാരിക്കുമ്പോൾ നടന്നകന്ന മേഴ്സി മിസ്സിനെ നോക്കി ആശ്ചര്യത്തോടെ തന്നെ നിന്നു കിരൺ’മല പോലെ വന്നത് എലി പോലെ പോയോ… ‘
അവിശ്വസനീയമായി നോക്കി കൊണ്ട് അവൻ സുഹൃത്തുക്കൾക്കു നേരെ തിരിഞ്ഞു ഒരു വിജയിയുടെ ഭാവത്തിൽ..
” കാശെടുക്കെടാ.. കണ്ടില്ലേ ഞാൻ മിസ്സിനോട് ചോദിച്ചത്.. “”പൊന്നളിയാ അപാര ധൈര്യം തന്നെ.. സമ്മതിച്ചു ”
കാശ് വച്ചു നീട്ടിയ സുഹൃത്ത് അതിശയത്തോടെ പറയുമ്പോൾ അല്പം ഗമയിൽ തന്നെ തന്റെ ബൈക്കിലേക്ക് കയറി കിരൺ.
” അപ്പോ ചേട്ടൻ പോയേക്കുവാണെ.. ഇനി നാളെ കാണാം ഇതുപോലെ ഇനിയും ബെറ്റുകൾ എന്തേലും ഉണ്ടേൽ പറയ് കേട്ടോ.. ഞാൻ റെഡിയാണ്.. ”
അത്രയും പറഞ്ഞു കൊണ്ടവൻ പതിയെ അവിടെ നിന്നും യാത്രയാകുമ്പോൾ അസൂയയോടെ നോക്കി നിന്നു പോയി സുഹൃത്തുക്കൾ.
വീട്ടിലെത്തുമ്പോൾ കിരണിന്റെ കയ്യിൽ ഒരു പൊതി ബിരിയാണിയും ഒരു ബോട്ടിൽ ബിയറും ഉണ്ടായിരുന്നു..”എന്നോടാ അവന്മാരുടെ കളി… ”
വീട്ടിൽ ചെന്ന് കേറിയ പാടെ ബിരിയാണി പൊതിയും തുറന്ന് വച്ച് ബിയർ ബോട്ടിലും പൊട്ടിച്ചു ഒരു കവിൾ അകത്താക്കി അവൻ..
‘ഇന്നത്തെ ദിവസം എന്തായാലും കൊള്ളാമായിരുന്നു. എന്നും ഇതുപോലായാൽ പൊളിച്ചു ‘
ഒരു പീസ് ചിക്കൻ എടുത്ത് കടിച്ചു കൊണ്ട് കിരൺ സെറ്റിയിലേക്ക് ചായുമ്പോൾ ഫോൺ റിങ് ചെയ്തു. ഡിസ്പ്ലേയിൽ പരിചയം ഇല്ലാത്ത നമ്പർ കണ്ട് സംശയത്തോടെയാണവൻ ആ കോൾ അറ്റന്റ് ചെയ്തത്.
” ഹലോ ആരാണ്.. “ആ ചോദ്യത്തിന് മറുപടിയൊന്നും ലഭിക്കാത്തത് അവനെ ചൊടിപ്പിച്ചു .” ആരാ ടാ ഇത് ഫോൺ വിളിച്ചിട്ട് മിണ്ടാതിരിക്കുന്നത്. ”
ഇത്തവണ കിരണിന്റെ ശബ്ദത്തിന് അല്പം കടുപ്പം കൂടിയപ്പോൾ മറു ഭാഗത്തു നിന്നും മറുപടി വന്നു..
” ടാ കോപ്പേ.. നീ കൂടെ കിടക്കാൻ ആളെ തപ്പി നടക്കുവാ അല്ലേ.. പറ്റിയ ആളെ സെറ്റ് ആക്കി തരട്ടെ ഞാൻ നീ ഒരിക്കലും മറക്കാത്ത ഒരാളെ. ”
ആ മറുപടി കേട്ട് കിരണിന്റെ നെറ്റി ചുളിഞ്ഞു. ചെറിയൊരു നടുക്കം ഉണ്ടായെങ്കിലും ഒരു കവിൾ ബിയർ കൂടി അകത്താക്കിയപ്പോൾ അല്പം ധൈര്യം കിട്ടി..
” സെറ്റ് ആക്കി താടാ നീ.. ഞാൻ ക്യാഷ് തരാം.. നീ എന്താ എന്നെ പേടിപ്പിക്കുവാണോ “”അതേ ടാ പേടിപ്പിക്കുവാ.. നീ പേടിക്കാൻ റെഡിയായിക്കോ മുട്ടൻ പണി വരുന്നുണ്ട്.. “” ഓ കൊണ്ട് വാ ഞാൻ കാത്തിരിക്കാം ഒന്ന് വെച്ചിട്ട് പോടാ.. ”
പുച്ഛത്തോടെ കോൾ കട്ട് ചെയ്ത് കിരൺ തന്നെ ആ സംഭാഷണം അവസാനിപ്പിച്ചു. ശേഷം സെറ്റിയിലേക്ക് ചാഞ്ഞു. പക്ഷെ മനസ്സിൽ എവിടെയോ ഒരു ഭയം ഉടലെടുക്കാതിരുന്നില്ല.
” ആരാകും അത്.. ഞാൻ ചെയ്ത കാര്യങ്ങൾ എല്ലാം അറിയുന്ന ആളാണല്ലോ.. പണി ആകുമോ ”
മനസ്സിലെ ടെൻഷൻ മാറാൻ കയ്യിലിരുന്ന ബിയർ മുഴുവൻ വേഗത്തിൽ കുടിച്ച് തീർത്തു അവൻ. ശേഷം വീണ്ടും ആലോചനയിൽ ആണ്ടു.” എന്നാലും ആരാലും അത്.. ”
ആ ഒരു ചോദ്യം അവന്റെ മനസിനെ വെക്കാതെ കുഴച്ചു. എന്തായാലും ഫുഡും കഴിച്ചതോടെ ക്ഷീണത്തിൽ സെറ്റിയിൽ ഇരുന്നു തന്നെ ഉറങ്ങി പോയി കിരൺ..
പിന്നെയവൻ ഞെട്ടിയുണരുന്നത് അനിയത്തി കാർത്തിക കോളേജിൽ തിരികെ കരഞ്ഞു കൊണ്ട് വന്ന് കയറുമ്പോൾ ആണ്. അവൾ വാതിൽ വലിച്ചു തുറന്ന് അകത്തേക്ക് കയറി പോയശേഷം വാതിൽ തിരികെ അടച്ച ഒച്ചയിൽ ആണ് കിരൺ ഉണർന്നത്.
ഉറക്കച്ചടവിൽ നിന്നും വേഗത്തിൽ മുക്തനാകവേ വെപ്രാളത്തിൽ ബിയർ ബോട്ടിൽ എടുത്ത് ഒളിപ്പിച്ച ശേഷം അനിയത്തിയുടെ മുറിയിലേക്കോടി അവൻ. ബെഡിൽ കരഞ്ഞു കൊണ്ട് കിടക്കുന്ന കാർത്തിയെ കണ്ട് അന്ധാളിപ്പോടെ അവൾകരികിലേക്ക് ചെന്നിരുന്നു കിരൺ.
” എന്താ കാർത്തു എന്താ പറ്റിയെ.. എന്തിനാ നീ കരയുന്നെ.. “അവന്റെ ചോദ്യം കേട്ടിട്ട് മറുപടിയൊന്നും പറഞ്ഞില്ല അവൾ. അതോടെ കിരണിന്റെ ക്ഷമ കെട്ടു.
“കാർത്തു.. ഒന്ന് പറയ് എന്താ ന്ന് “ഇത്തവണ അവന്റെ ഒച്ചയുയർന്നപ്പോൾ പതിയെ എഴുന്നേറ്റു കാർത്തിക.
” ഏട്ടാ … ഇന്ന് ഞാൻ തിരികെ ജംഗ്‌ഷനിൽ വന്ന് ബസിറങ്ങി നടന്നു വന്നപ്പോൾ ഒരുത്തൻ എന്റെ അടുത്ത് വന്നു.. എന്നിട്ട് ചോദിച്ചു.. അ.. അവന്റെ കൂടെ കിടക്കോ.. പതിനായിരം രൂപ തരാം ന്ന്. ”
പറഞ്ഞു തീർന്നപ്പോഴേക്കും അവൾ വീണ്ടുമൊന്ന് ഏങ്ങി.എന്നാൽ അത് കേട്ട കിരൺ വല്ലാത്ത നടുക്കത്തോടെ ഇരുന്നു പോയി.’നീ പേടിക്കാൻ റെഡിയായിരുന്നോ മുട്ടൻ പണി വരുന്നുണ്ട് ‘
ആ ഫോൺ കോൾ ആണ് അവൻ അപ്പോൾ മനസ്സിൽ ഓർത്തത്.’ആരോ അറിഞ്ഞു പണി തന്നതാണല്ലോ ഭഗവാനെ. ‘
കൈ കാലുകൾ വിറയ്ക്കുന്നത് പോലെ തോന്നി അവന്. കാർത്തിക അപ്പോഴേക്കും കരഞ്ഞു കൊണ്ട് ബെഡിലേക്ക് ചാഞ്ഞിരുന്നു.
” എനിക്കാകെ സങ്കടം ആയി ഏട്ടാ.. ആ ദുഷ്ടന് എങ്ങിനെ തോന്നി ഒരു പെൺകുട്ടിയോട് ഇങ്ങനൊക്കെ ചോദിക്കാൻ.. അത്രക്ക് അന്തസ്സില്ലാത്തവരും നമ്മുടെ നാട്ടിൽ ഉണ്ടല്ലോ.. ഓർത്തിട്ട് പുച്ഛം തോന്നുന്നു.”
അറപ്പോടെ കാർത്തിക പറയുമ്പോൾ പിന്നെ അവിടെ ഇരുന്നില്ല കിരൺ.
അവളുടെ നെറുകയിൽ ഒന്ന് തലോടി പതിയെ എഴുന്നേറ്റു അവൻ.
” ഏട്ടാ വഴക്കിനൊന്നും പോകല്ലേ.. “പിന്നാലെ എഴുന്നേറ്റ കാർത്തികയെ ഒന്ന് നോക്കി പതിയെ മുറിക്കു പുറത്തേക്ക് നടന്നു കിരൺ .’എന്നാലും അതാരാക്കും’
കിരണിന്റെ ഉള്ളം അപ്പോൾ പുകയുകയായിരുന്നു. തിരികെ സെറ്റിയിലേക്ക് വന്നിരിക്കുമ്പോൾ തന്നെ അമ്മ ഇന്ദുവും ജോലി കഴിഞ്ഞു വീട്ടിലേക്ക് വന്ന് കയറി. അമ്മയെ കണ്ട പാടെ ചാടി എഴുന്നേറ്റു അവൻ.
ഇന്ദുവിന്റെ മുഖം കുറുകിയിരിക്കുന്നത് കണ്ടപ്പോൾ തന്നെ കാർത്തിക അവളെ വിളിച്ചിട്ടുണ്ടാകും എന്ന് ഊഹിച്ചു അവൻ .” അ.. അമ്മ.. അവള് വിളിച്ചു അല്ലേ.. ”
“മ്.. “കടുപ്പത്തിൽ ഒന്ന് മൂളിയിട്ട് പതിയെ സെറ്റിയിലേക്കിരുന്നു ഇന്ദു.” നീ ഇരിക്ക്.. ഒരു കാര്യം സംസാരിക്കാൻ ഉണ്ട്… ”
അവളുടെ മുഖഭാവവും ശബ്ദത്തിലെ കാഠിന്യവും കാൺകെ എന്തോ പ്രശ്നമുണ്ട് എന്ന് തന്നെ ഉറപ്പായി. ചെറിയ നടുക്കത്തോടെ കിരൺ സെറ്റിയിലേക്കിരികവേ അവനെ തന്നെ അല്പസമയം തുറിച്ചു നോക്കി ഇരുന്നു ഇന്ദു ശേഷം സംസാരിച്ചു തുടങ്ങി.
” നിങ്ങടെ അച്ഛൻ മരിച്ചിട്ട് വർഷം ഇരുപത് കഴിയുന്നു. വേറൊരു വിവാഹത്തിന് എന്നെ വീട്ടുകാർ ഒരുപാട് വട്ടം നിർബന്ധിച്ചതാ. പക്ഷേ നിങ്ങൾക്ക് വേണ്ടി അത് ഞാൻ വേണ്ട ന്ന് വച്ചു.
സർക്കാർ ജോലി ഉണ്ടായിരുന്നതിനാൽ അന്തസായി തന്നെ നിങ്ങളെ വളർത്തി ഇത്രേം ആക്കി.. ഈ നാട്ടിലെ ഒരാള് പോലും ഇന്നേവരെ എന്നോട് മോശമായി ഒരു വാക്ക് സംസാരിച്ചിട്ടില്ല. അതിനുള്ള അവസരവും ഞാൻ ഒരുക്കിയിട്ടില്ല പക്ഷെ ഇന്ന് അങ്ങിനെ ഒരു ദുരനുഭവം ഉണ്ടായി എനിക്ക്.. ”
ഒന്ന് നിർത്തുമ്പോൾ കിരണിന്റെ മുഖത്തെ നടുക്കം ശ്രദ്ധിച്ചു അവൾ.” ഇന്ന് ബസിറങ്ങി വന്നപ്പോൾ ഒരാള് എന്റെയും അടുത്ത് വന്നു. മോളോട് ചോദിച്ച അതേ ചോദ്യം എന്നോടും അയാൾ ചോദിച്ചു. അവന്റെ ഒപ്പം കിടക്കാവോ കാശ് തരാം ന്ന് ”
ഇത്തവണ മറുപടി പോലും പറയാൻ കഴിയാത്ത വിധം നടുങ്ങി പോയി കിരൺ .” അ.. അമ്മേ.. ”
“വേണ്ട.. മോൻ കിടന്ന് പതറേണ്ട അവൻ എന്നോട് കാര്യങ്ങൾ പറഞ്ഞു എന്റെ മോന്റെ കോളേജിലെ നേരം പോക്കുകൾ. കേട്ടപ്പോ അറപ്പ് തോന്നി പോയി.
നിനക്കും ഇല്ലേ മോനെ ഒരു പെങ്ങൾ. ആ പ്രായം ഉള്ള കുട്ടികളോട് അല്ലേ നീ ഈ തോന്ന്യവാസം ചോദിക്കുന്നെ.. ഇന്ന് വന്നവനെ അനിയത്തിയോടും നീ ഈ വൃത്തികേട് ചോദിച്ചു അതിനുള്ള അവന്റെ പ്രതികാരം ആണ് ഇന്നിപ്പോൾ… ”
ഇന്ദു പറഞ്ഞു നിർത്തുമ്പോൾ കിരണിന്റെ മിഴികൾ നിറഞ്ഞിരുന്നു.” അമ്മേ ഞാൻ… “നാണക്കേടിനാൽ ചൂളിപ്പോയവൻ ഒരിക്കലും ഇങ്ങനൊരു തിരിച്ചടി പ്രതീക്ഷിച്ചിരുന്നില്ല.
“ഞാൻ മോളെ ഒന്ന് കാണട്ടെ പാവം.. അവൾ ആകെ വിഷമിച്ചു പോയി.. ഇനിയേലും ഇത്തരം തോന്ന്യവാസങ്ങൾ കാട്ടാൻ തോന്നുമ്പോൾ വീട്ടിലും പെണ്ണുങ്ങൾ ഉണ്ട് എന്ന കാര്യം ഓർത്തിട്ട് ചെയ്യണെ.. അപേക്ഷയാണ്.. ”
ഇന്ദുവിന്റെ ആ വാക്കുകൾ കേട്ട് കുറ്റബോധത്താൽ ഉരുകി കിരൺ. ആ നിമിഷം മരിച്ചു പോയെങ്കിൽ എന്ന് ആഗ്രഹിച്ചു പോയി അവൻ.
” അമ്മാ എന്നോട് ക്ഷെമിക്ക് അമ്മ.. എന്റെ തെറ്റ് എത്രത്തോളം വലുതായിരുന്നു എന്ന് ഇപ്പോൾ മനസിലാക്കുന്നു. വലിയ വൃത്തികേട് ആണ് ഞാൻ ചെയ്തത്… ഇനി മേലിൽ അങ്ങിനൊന്നും ചെയ്യില്ല.. ഉറപ്പ്.. എന്നെ വെറുക്കല്ലേ അമ്മ.. ”
തൊഴുകൈയ്യോടെ അവൻ കെഞ്ചുമ്പോൾ ദേഷ്യം വെടിഞ്ഞു പതിയെ അവന്റെ മുടിയിഴകളിൽ തലോടി ഇന്ദു.
” സാരമില്ല… മോൻ വിഷമിക്കേണ്ട കേട്ടപ്പോ അമ്മയ്ക്കും സഹിച്ചില്ല.. ഇനി ആവർത്തിക്കരുത് കാരണം കുടുംബത്തിൽ പിറന്നവർക്ക് ചേർന്ന പരിപാടിയല്ല അത്. ”
അത്രയും പറഞ്ഞു കൊണ്ടവർ അകത്തേക്ക് പോകുമ്പോൾ വല്ലാത്ത ആശ്വാസം തോന്നി കിരണിന്. ഒപ്പം ചെയ്ത തെറ്റുകൾ ഓർത്തു കുറ്റബോധവും..” ഭഗവാനെ.. എന്നോട് ക്ഷെമിക്കണെ… ”
തൊഴുകൈയ്യോടെ ഒരു നിമിഷം ഇരുന്ന ശേഷം പതിയെ ഉച്ചക്ക് കോൾ വന്ന നമ്പറിലേക്ക് അവൻ തിരികെ വിളിച്ചു.. ചെയ്ത തെറ്റിന് മാപ്പ് പറയാനായി…